Tù Dici O Mà

Ti vene in core à l'ispensata
In la memoria inzuccherata
Cum'è una voce chì risponde
È quandu l'ora ti cunfonde
Ghjè cum'è un abbracciu chì s'apre
Chì s'appiccica à le to labbre
È dici o Mà

Po quandu a vita face male
Chì tuttu vene à tempurale
Ch'elle sò stanche e to mane
Da ch'ellu hè duru u stentapane
Quandu a sera in casa toia
Ti manca appinuccia di gioia
Tù dici o Mà

Quand'è tù pensi à a to ghjente
Da qualchi locu di cuntinente
Ch'è tù fideghji l'almanaccu
È mandarie tuttu à Baccu
Quandu più nimu stà à sente
È chì u rigrettu si pò pente
Tù dici o Mà

È quandu ella hè guasi finita
Ch'è tù trascini a to vita
Ch'ellu ùn ci hè più ch'è una porta
È ch'ella hè pè l'ultima volta
Circhendu à mai la so manu
T'arricumandi pianu pianu
Pè ch'ella senti da quassù
Puru s'ella ùn risponde più
Tù dici o Mà...