Paraíso Ñemimby

Paraíso ñemimby
Che retã mbojeguahára
Cordillera-pe oime
Che táva Mbocayaty

Ñu porã ha ka'aguy
Kunu'û renda meméva
Ha imbohupa no'õitéva
Yhaguy ha Piray

Ho'ysã porãva y
Hetahaguémi avy'a
Rasámi oreakãhatã
Ha romuña pe ysyry

Paso Ingápe rojeity
Zanja Soro rohasa
Puente Kuépe ropyta
Pakuri'a rombyaty

Kane'õguimi roguapy
Ipiro'ýva ingaguýpe
Morotîva yvyku'ípe
Roikómiva rojoaty

Ojayvývo kuarahy
Ku rosêma piro'ýpe
Kavaju ári torýpe
Tapérema rojeity

Pyharérõ ñasãindy
Rohua'îma okaháre
Mbaraka ore pyti'áre
Romyangekói yvoty

Jazmín guýpe jeroky
Ñande polka pu porãme
Sapukái jepopetépe
Ndoroikuaái vy'a'ỹ

Ko'ág̃a aime mombyry
Rasa umíva ahekáva
Nda'areichéne, che táva
Nerendápe tajevy

Tajuhupami jey
Mayma che mitã irûnguéra
Ha tambovíva nde réra
Mbocayaty del Yhaguy

Sapy'ánte cheropevy
Ha ahecháma che képe
Osêramo aretépe
Maymáva nde yvoty

Ndijavýi iporavopy
Kuñataîeta iporãva
Ha umíva nembojeguáva
Mbocayaty del Yhaguy