Kalenda maya!

Kalenda maya
ni fuelhs de faya
ni chanz d'auzelh ni flors de glaya
non es que m·playa,
pros domna glaya,
tro qu'un ysnelh messatgier aya
del vostre belh cors, que·m retraya
plazer novelh qu'amors m'atraya,
e jaya
e·m traya
vas vos, domna veraya;
e chaya
de playa
·l gelos, ans que·m n'estraya.

Ma belh'amia,
per Dieu no sia
que ia·l gelos de mon dan ria;
que car vendria
sa gelozia,
si aitals dos amans partia;
qu'ieu ja joyos mais no seria,
no jois ses vos pro no·m tenria;
tal via
faria,
qu'om ia mais no·m veiria;
selh dia
morria,
donna pros, qu'ieu·s perdria.