Angepyhare

Angepyhare yvága hovy ryakuã yvoty guýpe
Rohecha ypy, mba'e neporãva, mborayhu memby
Che py'a rory añandu ikyrỹi ajávo ndeypýpe
Romomorãmi mba'eicharupípa ãicha ndejuky

Márõ nde jave che remimbyasýpe oiméne iporãva
Ha imarangatúva nde reko yvotýpe, kuñataĩmi
¿Nahi’ãipa ndéve, che retã memby che'ãreraháva
Ne rembe kyrỹi mborayhu ykuágui chemboy’umi?

Pévare ajapo ndéve purahéi ñane avañe’ême
Nahi'ãigui oime ambue ñe'ême he'êmbochyve
Ha ipype ahypýi che rembiay'uhéi ysapy satîme
Aropurahéivo ndéve aropojái mborayhupavê

Ndoje'ova'erãi pe nde pukavy che resa'ỹikuágui
Romoñe'êhápe nderehe ama'êvo angepyhare
Hi'ã roañuã, romokunu’û ko che jyva ári
Tove toikuaa mayma ohecháva che vy'apavê

Nahi'ãiko che ku ijaheipy tesaráipe oikóva
Pévare hi'ã ndéve aropojái che ñe'êpoty
Chéko avei ambueichaite aporohayhúva
Ha ndéve g̃uarã che ñe'ã mbytégui péinama ipoty

Nde ratypykua eirete yvu he'ê paha'ỹva
Yvága poty rory kangymíva nde resa jajái
Ha ne ñemonde ryakuã potî hyjuipareíva
Ndejojaha'ỹ ¡Márõ nde jave, kuña Paraguái!