Apytávo Cheañomi (feat. Luz Mabel Ortigoza)

Upe ára chereja resê reho mombyry
Pytãmba upe kuarahy naiporãvéi pyhare
Ha opa umi guyra ñe'ê, nahyakuãvéi yvoty
Oimépuku nembyasy avei chejaveve

Che apytu'ûme akói oikóva upe ka'aru
Ha py'ỹinteva ipyahu chemandu'árõ hese
Ku ñasêramo guare jaguata mbeguekatu
Upe tape kurusu jahupytyha peve

Mokõivéva japyta upérõ sapy'ami
Ha umi nde resa mimbi ipaha cheresape
Cheañuãvo ipahaite ere chéve mbeguemi
Ajujéyne voi ha ne'írã ág̃a peve

Upépepako apyta nderehe ajesareko
Ajopy che korasõ, rekañýma chehegui
Che resa'ỹi chejopi, ndaikatúi ajejoko
Ha mitãicha ajahe'o ajukuévo cheañomi

Oime ku ñane tapỹi ha'eñomíva opyta
Ñanandýpe oñeñuã, mba'embyasy memete
Kunu'û heñoihague, mainumby jerokyha
Ko'ág̃aramo g̃uarã oiko chugui tapere

Amoag̃égui upe nde ju asê aha akokuehe
Aipe'ávo umi hokê tuichaite cheãngapyhy
Akói ára, che reindy, maymáva ne ryakuãngue
Upe koty omyenyhê osênguévo kuarahy