Haughs o Cromdale

As A cam in by Auchendoun
A little wee bit frae the toun
Whan tae the Hielans A was bound
Tae view the haughs o Cromdale
A met a man in tartan trews
An speired at him whit was the news
Quo he, "the Hielan army rues
That ere we cam tae Cromdale"

"We were in bed sir, every man
Whan the English host upon us cam
A bluidy battle then began
Upon the haughs o Cromdale
The English horse, thae were sae rude
Thae bathed their hooves in Hielan bluid
But our brave clans thae bauldly stood
Upon the haughs of Cromdale"

"But alas we could nae langer stay
Out ower the hills we cam away
An sair we did lament the day
That ere we cam tae Cromdale"
Thus the great Montrose did say
"John Hielanman show me the way
An A will ower the hills this day
Tae view the haughs o Cromdale"

Thae were at dinner every man
Whan the great Montrose upon thaim cam
Anither battle then began
Upon the haughs o Cromdale
The Grant, Mackenzie an Mackay
As sune as great Montrose thae spied
It's then thae focht richt manfully
Upon the haughs o Cromdale

Macdonalds thae returned again
The Camerons did thair standard jine
Mackintosh played a bluidy game
Upon the haughs o Cromdale
O fifty thousan Cromwell's men
Five hundert fled tae Aberdeen
The rest o thaim lie on the plain
Upon the haughs o Cromdale